د ښځـو د ورځـې په ویاړ
نن ورځ د ښځو ده پر ښځو ستمونه کوي
نشته مکتب نه پوهنتون ملا جرمونه کوي
ولې ښکلا او له ښایست سترګې وړندې د ملا
ولې ښکلا ته دوي دیوال او زندانونه کوي
د پرښتو له آزادۍ ولې ډاریږي ملا
ولې پر زړه د ملا تور شیطان حکمونه کوي
د فساد یو لوری که ښځه بل خوا نر ولاړ دی
حق له فساد سره په یو شان چلندونه کوي
ملا دی ناست شپه تر سهار، د تور فکرو په لټه
کله نصاب کله د شرعې جنجالونه کوي
لوست پر تا بند، سیل پر تا بند ژوند پر زندان تیروه
د شرعیت پر نوم بیځای داسې حکمونه کوي
دوی ته تیارې ولې ښایسته د لمر رڼا نه ښکاري
د جهالت دیو ته لار خلاصه تورتمونه کوي
هم د دنیا او اخرت زده کړه پر علم کېږي
ولې ملا د علم لاره کې خنډونه کوي
علم رڼا ده د انسان عقل او سیرت رڼوي
د جهالت تورو دیوانو ته جیلونه کوي
هیڅ بهانه د علم لاره کې توجیح نه لري
هر څو ملا ورته له خیټې دلیلونه کوي.
(عبدالملک پرهیز)
بامـداد ـ فرهنگی و اجتماعی ـ ۹/ ۲۳ـ ۰۸۰۳
Copyright ©bamdaad 2023